Aezkoako armarrian basurdea ageri da. Giza talde batek animalia batekin bat egiten duenean, horrek ematen dizkion dohain totemikoak asko dira. Aezkoakoak, horren arabera, gogorrak, ausartak eta estratega zuhurrak izango ziren, eremua menderatuko zuten, eta beren umeak babestuko zituzten; halaber, ikaragarriak izango ziren zauritzen bazituzten.

Erronkariko armarrian zubia eta burua (mairu batena, esaten dutenez) ageri dira. Erronkarikoek Olasteko borrokan (Burgitik hurbil) 785ean izan zuten ausardia eta kemena islatzen dute.

Zaraitzuko armarrian azeria ageri da. Felipe II.ak Zaraitzuko kapareei egin zien emaitza izan zen. Erronkarikoen arabera, azeriak irudikatzen du Zaraitzukoek izan zuten jarrera iheskorra sarrazenoek Pirinioak hartu zituztenean.

Nabaskozeko almiradioa: Armarri laurdendua da: Lehen laurdena gorria da, Nafarroako kateekin. Bigarrena eta hirugarrena urdinak dira, urrezko bi lis lorerekin. Laugarrena zilarkara da, Santiagoren gurutze urdin batekin.
Almiradioko hiriburua denez, Nabaskozek beste armarri bat ere erabiltzen du gerra banderan. Hiru dorreko gaztelua da, eta zatituta dago: urre kolorea, batetik, eta hiru banda gorri, bestetik.